पनीर व चीज या दोन्ही गोष्टी मुलांच्या आवडीच्या आहेत. परंतु या दोन्ही गोष्टी नेहमी आपण एखादा पदार्थ पूर्ण करण्यासाठी म्हणून वापरतो. यांमध्ये काहीही न घालता त्यांच्या चवीचा आनंद मुलांना घेऊ दिला तर..? यासाठीच ‘पौष्टिक डब्याची चविष्ट रेसिपी’ या सदरात या वेळी आपण पाहत आहोत एक अनोखा पदार्थ, बर्ड नेस्ट... ...................
मुलांचा डबा पौष्टिक पदार्थांचा असावा असे आपण म्हणतो आणि हेच लक्षात ठेऊन मग त्यानुसार पदार्थ ठरवतो. पण एखाद्या वेळी या सगळ्या तत्त्वांना बाजूला ठेऊन जरा जास्त कॅलरीज असलेला, तेलकट असा एखादा पदार्थ आपण मुलांना ‘चीट डे’ म्हणून देऊ शकतो. अशा एखाद्या नवीन, अनोख्या पदार्थाने मुले नक्कीच खुश होतील.
साहित्य :
शेवया – अर्धी वाटी, बटाटा – दोन उकडलेले, चीज – एक क्यूब, पनीर - २५ ग्रॅम, आवडीच्या वाफवलेल्या भाज्या - पाव वाटी, ब्रेड असल्यास – एक स्लाइस, तेल – तळण्यासाठी, आले-मिरची व कोथिंबीर – आवडीप्रमाणे.
कृती :
- सर्वप्रथम उकडलेला बटाटा व ब्रेड एकत्र कुस्करून घ्या.
- त्यात मिरची, कोथिंबीर, आले आणि वाफवलेल्या भाज्या घाला.
- चवीपुरते मीठ घालून, या मिश्रणाचे अलगद छोटे छोटे गोळे बनवा.
- या गोळ्यांची वाटी बनवून त्यामध्ये किसलेले पनीर व चीज भरा.
- आता गोळा नीट बंद करून परत छान गोलाकार करून घ्या.
- हा गोळा शेवयांमध्ये चांगला घोळून घ्या.
- शेवया चिकटत नसल्यास अत्यंत पातळ मैद्याची पेस्ट करून हा गोळा त्यात बुडवा व लगेच शेवयांवर रोल करा म्हणजे त्या चिकटतील.
- आता हे गोळे गरम तेलात तळून घ्या.
- डब्यात भरताना गोल मधोमध कापा म्हणजे ते पक्ष्यांच्या घरट्याप्रमाणे दिसू लागेल.
- हा पदार्थ हिरवी चटणी किंवा सॉसबरोबर सर्व्ह करा.
- आश्लेषा भागवत
मोबाइल : ९४२३० ०८८६८
ई-मेल : ashlesha0605@gmail.com
(लेखिका पुण्यातील आहारतज्ज्ञ आहेत.)
